អត្ថបទដកស្រង់ពី៖ Hello គ្រូពេទ្យ
សុខភាព៖ អណ្ដាត មិនមែនគ្រាន់តែអាចត្រឹមដឹងរសជាតិអាហារនោះទេ តែក៏អាចប្រាប់ឱ្យដឹងថា រាងកាយកំពុងមានបញ្ហាអ្វីមួយដែរ នៅពេលមានសញ្ញាទាំង៩នេះ។
១. អណ្ដាតឡើងអុជក្រហម ឬពងបែក៖ អណ្ដាតឡើងអុជក្រហម ឬពងបែក ដែលមិនបាត់ក្នុងរយៈពេលយូរ អាចជារោគសញ្ញានៃជំងឺធ្ងន់ធ្ងរ។ សញ្ញានេះច្រើនតែជាប់ទាក់ទងនឹងមហារីកអណ្ដាត ហើយបើអណ្ដាតមានសញ្ញានេះ គួរទៅពិគ្រោះជាមួយគ្រូពេទ្យជាបន្ទាន់។ ២.អណ្ដាតឡើងផ្សិត៖ នៅពេលអណ្ដាតមានដំបៅហើយមានការឈឺចាប់ គឺជាសញ្ញានៃជំងឺច្រាំងអណ្តាត ដែលជាជំងឺកើតមានញឹកញាប់បំផុតចំពោះកុមារ បើមនុស្សពេញវ័យក៏មានខ្លះដែរ។ នេះជាសញ្ញានៃភាពតានតឹង និងប្រព័ន្ធភាពស៊ាំចុះខ្សោយ ជាធម្មតាអាចបាត់ក្នុងរយៈពេល២សប្ដាហ៍។ ៣.អណ្ដាតឡើងអុជសៗ៖ នៅពេលដែលអណ្ដាតឡើងអុជសៗ អាចជាសញ្ញាថា មានអ្វីធ្វើឱ្យប្រតិកម្មស្បែក។ ឧទាហរណ៍ ពេលលោកអ្នកយកអណ្ដាតទៅត្រដុសជាប់នឹងធ្មេញ អាចបណ្ដាលឱ្យមានបញ្ហានេះ។តែយ៉ាងណា សញ្ញានេះក៏អាចបណ្តាលមកពីការកើនឡើង នៃកោសិកាដែលមកពីការជក់បារី។ ចន្លោះពី៥ភាគរយទៅ១៧ភាគរយនៃកោសិកាទាំងនេះ អាចជាកោសិកាមុនមហារីក ហើយបើស្នាមអុជសៗទាំងនោះ មិនអាចបាត់ក្នុងរយៈពេលជាច្រើនសប្តាហ៍។
៤. អណ្ដាតពណ៌ក្រហមដូចផ្លែស្ត្របឺរី៖ អណ្ដាតពណ៌ក្រហមដូចផ្លែស្ត្របឺរី អាចជាសញ្ញាបង្ហាញថា រាងកាយខ្វះវីតាមីន។បើអណ្ដាតមានសភាពភ្លឺរលោង ឬមានពណ៌ក្រហមស្ត្របឺរី បានន័យថា ក្នុងខ្លួនមានជាតិដែក ឬវីតាមីនB១២ មិនគ្រប់គ្រាន់ទេ។ ក្នុងករណីធ្ងន់ធ្ងរ អាចនឹងមានការឈឺចាប់ខ្លាំងពេលផឹកភេសជ្ជៈក្ដៅ និងញ៉ាំអាហារហិល។ ៥. ឡើងកន្ទួល ឬពកៗលើអណ្ដាត៖ ឡើងកន្ទួលលើអណ្ដាត ភាគច្រើនមិនបង្ហាញពីបញ្ហាសុខភាពណាមួយគួរបារម្ភទេ ប្រសិនបើវាមិនមានការឈឺចាប់។៦. អណ្ដាតមានជ្រាំងពណ៌-ស៖ អណ្ដាតទ្បើងជ្រាំងពណ៌-ស អាចជាសញ្ញាមួយនៃការឆ្លងមេរោគផ្សិត ឬជំងឺខេនដឹដ្រាយអាសេស(Candidiasis)។ សញ្ញានេះលេចឡើងនៅពេលមេរោគផ្សិតលូតលាស់ខ្លាំងពេក ហើយមូលហេតុបង្កបញ្ហាអាចបណ្ដាលមកពីការប្រើថ្នាំអង់ទីប៊ីយូទិច កើតជំងឺទឹកនោមផ្អែម មានប្រព័ន្ធភាពស៊ាំខ្សោយ ឬសម្ពាធឈាមខ្ពស់។
៧.អណ្ដាតមានជ្រាំងពណ៌ខ្មៅ ឬពណ៌ត្នោត៖ អណ្ដាតមានពណ៌ខ្មៅ ឬពណ៌ត្នោត នៅចំកណ្ដាលភាគច្រើនគ្រាន់តែជាសញ្ញានៃការធ្វើអនាម័យមិនល្អ ការជក់បារី ឬផឹកកាហ្វេ ឬតែខ្មៅច្រើន អាចមានក្លិនមិនល្អចេញពីមាត់ និងពិបាកសម្គាល់រសជាតិ។ បើចង់បាត់ត្រូវបោះចោលទម្លាប់អាក្រក់ ដែលបណ្ដាលឱ្យមានស្នាមខ្មៅ និងចាប់ផ្ដើមសម្អាតអណ្ដាត ជាប្រចាំរាល់ពេលដុសធ្មេញ។៨. អណ្ដាតប្រេះ៖ ស្នាមប្រេះលើអណ្ដាតមិនបង្កជាក្ដីបារម្ភអ្វីទេ តែបើលោកអ្នកមិនដុសធ្មេញបានខ្ជាប់ខ្ជួនទេ នោះការឆ្លងរោគអាចកើតឡើង។ ការឆ្លងមេរោគផ្សិតអាចវិវត្តត្រង់កន្លែងប្រេះ ធ្វើឱ្យឈឺចាប់ខ្លាំង និងធ្វើក្រហាយអណ្ដាត។៩. ក្រហាយអណ្ដាត៖ ក្រហាយអណ្ដាត ជាសញ្ញាទូទៅមួយចំពោះស្ត្រីដែលជិតដល់ពេលអស់វដ្ដរដូវ ហើយអ័រម៉ូនផ្លាស់ប្ដូរ។ មួយវិញទៀត អាចបណ្ដាលមកពីការប្រើថ្នាំដុសធ្មេញខុសដែរ ព្រោះមនុស្សមួយចំនួន អាចប្រតិកម្ម នឹងសារធាតុផ្សំណាមួយក្នុងថ្នាំដុសធ្មេញ៕
