ឈឺបំពង់ក គឺជារោគសញ្ញាមួយដែលបង្ហាញថាអ្នកមានជំងឺផ្តាសាយ ឬគ្រុនផ្តាសាយ។ មូលហេតុមួយចំនួនដែលធ្វើឲ្យឈឺបំពង់ក ដោយសារអ្នកបញ្ចេញសំឡេង ឬស្រែកខ្លាំងៗ និងបញ្ហាអាលែកស៊ី ជាដើម។ ឈឺបំពង់ក នឹងធ្វើឲ្យអ្នក រមាស់ ឬរលាក។ ទោះបីជាការឈឺបំពង់កមិនធ្ងន់ធ្ងរត្រូវទៅជួបគ្រូពេទ្យក៏ដោយ វានៅតែឈឺ ហើយអាចរារាំងអ្នកមិនឱ្យគេងលក់ស្រួល។ ប៉ុន្តែកុំបារម្ភ អ្នកអាចប្រើឱសថព្យាបាលនៅផ្ទះដើម្បីបំបាត់ការឈឺចាប់ និងការរលាក។
1. ទឹកឃ្មុំ៖ ទឹកឃ្មុំលាយក្នុងតែ ឬទឹកឃ្មុំតែឯង គឺជាឱសថព្យាបាលនៅផ្ទះ សម្រាប់រោគសញ្ញានៃការឈឺបំពង់ក។ ដោយសារតែហានិភ័យនៃជំងឺ botulism, ទារក, កុមារអាយុក្រោម 1 ឆ្នាំមិនគួរទទួលទានទឹកឃ្មុំឡើយ។
2. ខ្ពុរមាត់ទឹកអំបិល៖ ការខ្ពុរមាត់ជាមួយនឹងទឹកអំបិលក្ដៅឧណ្ហៗ អាចជួយសម្រួលការឈឺបំពង់ក។ វាត្រូវបានគេស្គាល់ផងដែរថាអាចជួយសម្លាប់បាក់តេរីក្នុងបំពង់ក។ដាក់អំបិលកន្លះស្លាបព្រាកាហ្វេទៅក្នុងទឹកក្ដៅឧណ្ហៗមួយកែវ។ ខ្ពុរមាត់ជាមួយវាដើម្បីកាត់បន្ថយការហើម និងរក្សាបំពង់កឱ្យស្អាត។ យោងតាមសមាគម Osteopathic របស់អាម៉េរិក អ្នកដែលឈឺបំពង់ក គួរតែធ្វើបែបនេះ យ៉ាងហោចណាស់ម្ដងក្នុងមួយម៉ោង។
3. ជីវ៉ាន់ស៊ុយ ៖ ជីវ៉ាន់ស៊ុយ (Peppermint) ត្រូវបានគេស្គាល់យ៉ាងច្បាស់ចំពោះសមត្ថភាពរបស់វាក្នុងការធ្វើឱ្យដង្ហើមស្រស់ថ្លា។ វាក៏មានលក្ខណៈសម្បត្តិប្រឆាំងនឹងការរលាក ក៏ដូចជាគុណសម្បត្តិប្រឆាំងបាក់តេរី និងប្រឆាំងមេរោគមួយចំនួនផងដែរ។ លើសពីនេះ វាផ្ទុកសារធាតុ menthol ដែលជួយឱ្យស្លេសស្តើង និងបំបាត់ការឈឺបំពង់ក និងក្អក។ ខណៈដែលតែជីវ៉ាន់ស៊ុយច្រើនអាចរកទិញបាន អ្នកក៏អាចធ្វើដោយខ្លួនឯងបានដែរ។ ដាក់ស្លឹកជីវ៉ាន់ស៊ុយក្រៀមមួយចំនួនក្នុងទឹកឆ្អិន រួចទុកល្បាយនោះពីរបីនាទី។
4. ខ្ទឹមស៖ ខ្ទឹមសមានលក្ខណៈសម្បត្តិប្រឆាំងនឹងបាក់តេរីធម្មជាតិផងដែរ។ វាមានផ្ទុកសារធាតុ allicin ដែលត្រូវបានគេស្គាល់ថាប្រយុទ្ធប្រឆាំងនឹងការឆ្លងមេរោគ។ ការទទួលទានខ្ទឹមសជារៀងរាល់ថ្ងៃអាចជួយការពារ និងព្យាបាលការឆ្លងមេរោគរលាកផ្លូវដង្ហើម ខណៈការឆ្លងមេរោគផ្លូវដង្ហើមអាចបណ្តាលឱ្យឈឺបំពង់ក។ ការដាក់ខ្ទឹមសស្រស់ទៅក្នុងរបបអាហាររបស់អ្នកគឺជាវិធីមួយក្នុងការទាញយកអត្ថប្រយោជន៍ពីលក្ខណៈសម្បត្តិប្រឆាំងនឹងមេរោគរបស់វា។ អ្នកក៏អាចសាកល្បងបៀម ឬទំពារខ្ទឹមស។
5. ចំហាយឬសំណើម៖ ខ្យល់ស្ងួតអាចធ្វើឱ្យរលាកបំពង់កថែមទៀត។ ការបន្ថែមសំណើមខ្លះទៅខ្យល់អាចជួយបាន។ ជាឧទាហរណ៍ ការស្រូបចំហាយទឹកអាចជួយសម្រួលដល់ការឈឺបំពង់ក។ ដើម្បីធ្វើដូច្នេះ ដាក់ទឹកឆ្អិនទៅក្នុងចានមួយ។ យកកន្សែងមកគ្របលើក្បាលរបស់អ្នក ហើយដកដង្ហើមតាមធម្មតា ដោយអនុញ្ញាតឱ្យចំហាយចូលតាមមាត់ និងច្រមុះ។ ធ្វើបែបនេះរយៈពេល ១០ ទៅ ១៥ នាទី។ អ្នកប្រហែលជាត្រូវបន្ថែមទឹកឆ្អិនបន្ថែមទៀតទៅក្នុងចានដើម្បីរក្សាវាឱ្យមានក្លិនឈ្ងុយ។
6. សម្រាក៖ នៅចុងបញ្ចប់នៃមួយថ្ងៃៗ ការសម្រាកជាអ្វីដែលអ្នកត្រូវការ។ ប្រសិនបើអ្នកមានអារម្មណ៍ថាឈឺបំពង់ក សូមធានាថាអ្នកបានគេងគ្រប់គ្រាន់។ មជ្ឈមណ្ឌលគ្រប់គ្រង និងការពារជំងឺ (CDC) បានកត់សម្គាល់ថា ការគេងមិនលក់អាចបង្កើនហានិភ័យនៃការវិវត្តទៅជាជំងឺឆ្លង។ ការគេងមិនលក់ធ្ងន់ធ្ងរសូម្បីតែមួយយប់ក៏អាចនាំឱ្យមានការកើនឡើងនៃប្រូតេអ៊ីនរលាកដែលហៅថា cytokines។ វាក៏អាចជាគំនិតដ៏ល្អក្នុងការសម្រាកឬផ្អាកសំឡេងរបស់អ្នកផងដែរ។ សកម្មភាពដូចជានិយាយខ្លាំងៗ ច្រៀង ឬការស្រែក អាចនឹងធ្វើឱ្យរលាកបំពង់ករបស់អ្នកកាន់តែខ្លាំង។
អ្វីដែលត្រូវជៀសវាង៖ ប្រសិនបើអ្នកឈឺបំពង់ក ការប៉ះពាល់នឹងអាហារមួយចំនួន ឬកត្តាបរិស្ថានអាចធ្វើឱ្យរោគសញ្ញារបស់អ្នកកាន់តែអាក្រក់។ ខណៈពេលដែលអ្នកកំពុងជាសះស្បើយ សូមព្យាយាមជៀសវាងរឿងដូចខាងក្រោមនេះ៖ ខ្យល់ស្ងួត, ការជក់បារី ឬស្រូបផ្សេងបារី, ការបំពុលខ្យល់, សារធាតុអាលែហ្សីដែលអាចមានដូចជា លំអង ឬផ្សិតសត្វចិញ្ចឹម, ផ្សែងគីមី ដូចជាផ្សែងចេញពីទីតាំងសម្អាតផ្ទះ, ជាតិអាល់កុល, អាហារ ឬភេសជ្ជៈដែលមានជាតិអាស៊ីត ដូចជាក្រូចឆ្មារ, ប៉េងប៉ោះ ឬភេសជ្ជៈដែលមានជាតិកាបូន, អាហារស្ងួត ឬរឹង, អាហារហឹរ។
ការសាកល្បងប្រើឱសថធម្មជាតិទាំងនេះ អាចជួយអ្នកឱ្យមានអារម្មណ៍ធូរស្រាល និងជួយអ្នកឱ្យលែងត្រូវការធ្វើដំណើរទៅកាន់ជួបគ្រូពេទ្យ។ ដើម្បីមានអារម្មណ៍ល្អបំផុត ត្រូវប្រាកដថាអ្នកផឹកទឹកឱ្យបានច្រើន និងសម្រាកឱ្យបានច្រើន។ ទៅជួបគ្រូពេទ្យ ប្រសិនបើការឈឺបំពង់ករបស់អ្នកមិនធូរស្រាល ឬចាប់ផ្តើមកាន់តែធ្ងន់ធ្ងរ បើទោះបីជាអ្នកប្រើប្រាស់ឱសថតាមផ្ទះ៕ healthline
