ការមានផ្ទៃពោះក្នុងវ័យជំទង់គឺជាការមានផ្ទៃពោះចំពោះស្ត្រីដែលមានអាយុ
១៩ ឆ្នាំឬក្មេងជាងនេះ។ ការមានផ្ទៃពោះនូវវ័យក្មេង អាចប្រឈមនឹងហានិភ័យផ្សេងៗ ប៉ុន្តែបើកាលណាមានការថែទាំសុខភាពទាំងម្តាយ និងទាំងកូនបានល្អប្រសើរ នោះពួកគេនឹងជៀសផុតពីហានិភ័យផ្សេងៗ។
តើអ្វីជាសញ្ញានៃការមានផ្ទៃពោះ? ស្ត្រីប្រហែលជាដឹងខ្លួនថាមានផ្ទៃពោះនៅពេលដែលអ្នករដូវទៀងទាត់បានផ្អាក។ ទោះយ៉ាងណា អាចមានការហូរឈាមតិចៗក្នុងរយៈពេលប៉ុន្មានសប្តាហ៍ដំបូងនៃការមានផ្ទៃពោះ។ សញ្ញានៃការមានផ្ទៃពោះរួមមាន៖ ខកខានមករដូវឬមកស្រាលៗ, ភាពទន់នៃសុដន់, ចង្អោរជាញឹកញាប់នៅពេលព្រឹក, ក្អួត, មានអារម្មណ៍ថាស្រាលក្បាល, ដួលសន្លប់, ឡើងទម្ងន់, មានអារម្មណ៍ថាអស់កម្លាំង, ហើមពោះ។
តើការមានផ្ទៃពោះក្នុងវ័យជំទង់មានឥទ្ធិពលយ៉ាងណាចំពោះម្ដាយវ័យក្មេង?
ក្មេងជំទង់មានហានិភ័យខ្ពស់ចំពោះជំងឺលើសឈាមដែលទាក់ទងនឹងការមានផ្ទៃពោះ (preeclampsia) ជាងម្តាយដែលមានអាយុជាមធ្យម។ ហានិភ័យសម្រាប់ទារករួមមានការកើតមិនគ្រប់ខែ និងទម្ងន់កំណើតទាប។ Preeclampsia ក៏អាចបង្កគ្រោះថ្នាក់ដល់ក្រលៀន ឬអាចបណ្តាលឲ្យស្លាប់ដល់ម្តាយ ឬទារកផងដែរ។ ក្មេងជំទង់មានផ្ទៃពោះក៏មានឱកាសខ្ពស់ប្រឈមនឹងការស្លេកស្លាំងដែរ, ថយចុះនៃចំនួនកោសិកាឈាមក្រហម (RBCs)។ នេះអាចធ្វើឲ្យម្តាយមានអារម្មណ៍ទន់ខ្សោយ និងអស់កម្លាំង ហើយអាចប៉ះពាល់ដល់ការលូតលាស់របស់កូន។
យោងតាមអង្គការសុខភាពពិភពលោក (WHO) បញ្ជាក់ថា ផលវិបាកអំឡុងពេលមានផ្ទៃពោះ ឬការសម្រាលកូនគឺជាមូលហេតុចម្បងនៃការស្លាប់ទូទាំងពិភពលោកសម្រាប់ក្មេងស្រីដែលមានអាយុពី ១៥ ទៅ ១៩ ឆ្នាំ។ ប្រសិនបើអ្នកមានផ្ទៃពោះក្នុងវ័យជំទង់ អ្នកប្រហែលជាមានអារម្មណ៍ភ័យខ្លាច និងព្រួយបារម្ភអំពីការប្រាប់ក្រុមគ្រួសារ និងមិត្តភក្តិរបស់អ្នក។ ការមិននិយាយទៅកាន់នរណាម្នាក់ និងមិនទទួលបានជំនួយ និងការគាំទ្រដែលអ្នកត្រូវការ អាចធ្វើឱ្យអ្នកមានអារម្មណ៍ឯកោ និងធ្លាក់ទឹកចិត្តកាន់តែខ្លាំង។ នេះអាចនាំឱ្យមានបញ្ហានៅក្នុងផ្ទះ និងនៅសាលារៀន។ ក្មេងជំទង់មានផ្ទៃពោះជាច្រើនបោះបង់ការសិក្សា ហើយខ្លះមិនបានបញ្ចប់ការសិក្សារបស់ពួកគេ។ ស្ត្រីដែលមានផ្ទៃពោះដំបូងក្នុងវ័យជំទង់ទំនងជាមានកូនច្រើនជាងម្នាក់។ ស្ត្រីដែលមានការអប់រំតិចតួច និងមានកូនច្រើនត្រូវមើលថែកូន នឹងពិបាករកប្រាក់ចិញ្ចឹមជីវិត។ នោះមានន័យថា ម្តាយជាច្រើនដែលមានផ្ទៃពោះក្នុងវ័យជំទង់រស់នៅក្នុងភាពក្រីក្រ។
តើការមានផ្ទៃពោះក្នុងវ័យជំទង់មានឥទ្ធិពលយ៉ាងណាចំពោះទារក?
ការមានផ្ទៃពោះដែលមានសុខភាពល្អមានរយៈពេល ៤០ សប្តាហ៍។ ទារកដែលសម្រាលមុន ៣៧ សប្តាហ៍នៃការមានផ្ទៃពោះគឺមុនកំណត់។ ម្តាយវ័យជំទង់ទំនងផ្តល់កំណើតដល់ទារកមិនគ្រប់ខែ។ ពេលខ្លះទារកទាំងនេះខ្វះការលូតលាស់រាងកាយពេញលេញ និងខួរក្បាលរបស់ពួកគេ។ វាអាចនាំឱ្យមានការលំបាកពេញមួយជីវិតជាមួយនឹងសុខភាព និងការលូតលាស់។ ទារកមិនគ្រប់ខែ ក៏ប្រឈមនឹងបញ្ហាទម្ងន់តិចផងដែរ។ ទារកដែលមានទម្ងន់មិនគ្រប់គ្រាន់អាចនឹងមានបញ្ហាក្នុងការដកដង្ហើម និងការបំបៅកូន។ ទារកដែលមិនមានទម្ងន់គឺងាយនឹងកើតជំងឺដូចជាជំងឺទឹកនោមផ្អែម និងជំងឺបេះដូង នៅពេលពេញវ័យ។ ទម្ងន់កំណើតមិនគ្រប់ក៏ប៉ះពាល់ដល់ការលូតលាស់ខួរក្បាលដែរ។ កុមារដែលកើតមកមិនគ្រប់ទម្ងន់ ត្រូវបានគេសង្កេតឃើញថា មានការលំបាកក្នុងការសិក្សា។ ក្រៅពីមានការកើនឡើងហានិភ័យនៃការធាត់ ទារកដែលកើតពីម្តាយវ័យជំទង់ក៏មានហានិភ័យខ្ពស់នៃការស្លាប់របស់ទារកផងដែរ។
ម្តាយវ័យជំទង់អាចមានកូនដែលមានសុខភាពល្អ ប៉ុន្តែត្រូវប្រាកដថាបានទៅជួបគ្រូពេទ្យភ្លាមៗនៅពេលដែលដឹងខ្លួនថាមានផ្ទៃពោះ។ ការថែទាំសុខភាពទារកត្រឹមត្រូវក្នុងអំឡុងពេលមានផ្ទៃពោះមានសារៈសំខាន់ខ្លាំងណាស់ចំពោះសុខភាព និងសុខុមាលភាពរបស់ទាំងម្តាយ និងទារក។ ញ៉ាំអាហារឱ្យបានល្អ ធ្វើលំហាត់ប្រាណ និងមានការផ្តល់កម្លាំងចិត្ត និងថែទំាពីក្រុមគ្រួសារ មិត្តភក្តិ។ ការជក់បារីអំឡុងពេលមានផ្ទៃពោះ កាត់បន្ថយទម្ងន់កំណើត និងធ្វើឱ្យទារកកើតមិនគ្រប់ខែ។ ទន្ទឹមនឹងនេះ គ្រឿងញៀន និងគ្រឿងស្រវឹងអាចប៉ះពាល់ដល់ម្តាយ និងកូនដែលមិនទាន់កើត។ ដូច្នេះកុំពិសារគ្រឿងស្រវឹង ឬប្រើប្រាស់គ្រឿងញៀនខុសច្បាប់ ក្នុងអំឡុងពេលមានផ្ទៃពោះ។ ញ៉ាំតែថ្នាំដែលគ្រូពេទ្យចេញវេជ្ជបញ្ជា។ វាជារឿងសំខាន់សម្រាប់ស្ត្រីមានផ្ទៃពោះទាំងអស់ ដើម្បីទទួលបានការថែទាំសុខភាពត្រឹមត្រូវ មិនថាពួកគេមានអាយុប៉ុន្មាននោះទេ។ ប៉ុន្តែដោយសាររាងកាយរបស់ក្មេងជំទង់នៅតែមានការលូតលាស់ ដូច្នេះការទៅជួបគ្រូពេទ្យជាប្រចាំគឺមានសារៈសំខាន់ជាពិសេសសម្រាប់ម្តាយវ័យជំទង់៕ source: healthline
