ចេកគឺជាផ្លែឈើដ៏ល្អបំផុតមួយសម្បូរប៉ូតាស្យូម និងជាតិសរសៃ។ ទោះជាយ៉ាងណាក៏ដោយ អត្ថប្រយោជន៍មួយចំនួននៃផ្លែចេក ត្រូវបានគេអះអាងថា លើសពីការទទួលទានវា។ ធាតុផ្សំដ៏គួរឱ្យកត់សម្គាល់មួយមានក្នុងចេកគឺ ស៊ីលីកា ដែលជាខ្សែស្រឡាយរបស់ស៊ីលីកុន។ ស៊ីលីកាក្នុងផ្លែចេកអាចជួយបង្កើនការផលិតកូឡាជែន ដែលជាប្រូតេអ៊ីនធម្មជាតិដែលជួយឱ្យស្បែកមានសំណើម និងរលោង។ ទន្ទឹមនឹងនេះ ផ្លែចេកមានផ្ទុកសារធាតុចិញ្ចឹមមួយចំនួន ដែលអាចជួយដល់សុខភាពស្បែកដូចជា ប៉ូតាស្យូម, វីតាមីន B-6, វីតាមីន C, វីតាមីន A។ ដូច្នេះហើយទើបបានជាម៉ាសបិតមុខចេកជួយដោះស្រាយបញ្ហាសើស្បែកជាច្រើន៖
១) ជួយបំបាត់ស្នាមជ្រីវជ្រួញ៖ នៅពេលអ្នកចាស់ទៅ វាជាការធម្មជាតិក្នុងការបាត់បង់កូឡាជែនក្នុងស្បែក។ ការបាត់បង់ខូឡាជែនអាចធ្វើឱ្យស្បែកកាន់តែលែងតឹងណែន ហើយអាចបង្កើនស្នាមជ្រួញ។ ម៉ាសបិតមុខចេកអាចជួយបង្កើនកូឡាជែនហើយកាត់បន្ថយភាពជ្រីវជ្រួញ។
២) ជួយឱ្យស្បែកភ្លឺថ្លា៖ ចេកសម្បូរទៅដោយសារធាតុប្រឆាំងអុកស៊ីតកម្ម ដែលជួយប្រឆាំងរ៉ាឌីកាល់សេរីក្នុងរាងកាយ។ ការលាបសារធាតុប្រឆាំងអុកស៊ីតកម្មលើស្បែករបស់អ្នកអាចជួយការពារពីការខូចខាតរ៉ាឌីកាល់សេរី នាំឱ្យស្បែកភ្លឺជាងមុនដែរ។
៣) ជួយព្យាបាលមុន៖ ចេកអាចជួយមុនដោយកាត់បន្ថយការរលាកនៅលើស្បែក។ សារធាតុ Phenolics នៅក្នុងផ្លែចេកមានសារធាតុប្រឆាំងមេរោគក្នុងការព្យាបាលដំបៅមុន។
៤) ជួយបំបាត់ស្នាមមុន៖ ផ្លែចេកអាចកាត់បន្ថយជាតិពណ៌ក្រហមក្នុងស្បែក ដោយមានជំនួយពីវីតាមីន A និង C។ វាអាចជួយបំបាត់ស្នាមអុជខ្មៅ។
៥) ជួយការពារកម្តៅថ្ងៃ៖ ផ្លែចេកមានផ្ទុកនូវសារធាតុប្រឆាំងអុកស៊ីតកម្មដែលអាចបង្កើនសមត្ថភាពធម្មជាតិនៃស្បែករបស់អ្នកក្នុងការការពារការបំផ្លាញពីពន្លឺព្រះអាទិត្យ។
ខ. វិធីធ្វើម៉ាសបិតមុខចេក៖ គ្រឿងផ្សំសំខាន់គឺចេកទុំ។ អ្នកក៏អាចបង្កើនឥទ្ធិពលដោយបន្ថែមគ្រឿងផ្សំផ្សេងទៀត អាស្រ័យលើគោលដៅនៃការថែរក្សាស្បែករបស់អ្នក ដូចជា ទឹកឃ្មុំសម្រាប់ស្បែកស្ងួត ស្បែកខ្លាញ់ និងមុន, ជាមួយទឹកក្រូចឆ្មារដើម្បីជួយសម្រាលស្លាកស្នាម, ជាមួយផ្លែបឺរដើម្បីជួយបំពេញជាតិសំណើម, ជាមួយម្សៅរមៀតដើម្បីកាត់បន្ថយស្នាមអុចខ្មៅ និងមុន និងបង្កើនពន្លឺ។ ពេលដែលអ្នកបានគ្រឿងផ្សំដែលចង់បានហើយ សូមធ្វើតាមជំហានខាងក្រោមនេះ៖ ដំបូងលាយគ្រឿងផ្សំទាំងអស់នៅក្នុងចានមួយដោយបន្ថែមទឹកប្រសិនបើចាំបាច់, លាបលើស្បែកស្អាត និងស្ងួត, ទុកចោល ១០ ទៅ ១៥ នាទី សឹមលាងចេញជាមួយទឹកក្ដៅឧណ្ហៗ។ អនុវត្តពីរទៅបីដងក្នុងមួយសប្តាហ៍។ ប្រសិនបើអ្នកជួបប្រទះបញ្ហាក្រហម ឬកន្ទួល បន្ទាប់ពីការប្រើប្រាស់ម៉ាសបិតមុខចេក សូមទៅជួបគ្រូពេទ្យជំនាញសើស្បែក។
គ. ផលប៉ះពាល់ដែលអាចកើតមាន៖ មនុស្សមួយចំនួនគួរចៀសវាងម៉ាសបិតមុខចេកប្រសិនបើពួកគេអាឡែរហ្សីនឹងចេក ឬជ័រ ឬលំអង។ សញ្ញានៃប្រតិកម្មទៅនឹងម៉ាសបិតមុខចេករួមមាន៖ ស្បែករមាស់, កន្ទួលក្រហម, ហើមស្បែក, កណ្តាស់, ដង្ហើមខ្លី និងរោគសញ្ញាជំងឺហឺតផ្សេងទៀត។ វាក៏អាចមានប្រតិកម្មធ្ងន់ធ្ងរដែលគំរាមកំហែងដល់អាយុជីវិតផងដែរ ដូចជាពិបាកដកដង្ហើម ហើមមុខ និងដួលសន្លប់។ ករណីនេះត្រូវការជំនួយផ្នែកវេជ្ជសាស្រ្ដសង្គ្រោះបន្ទាន់។
ចូរចងចាំថា ការប្រើម៉ាសមុខពីរបីដងក្នុងមួយសប្តាហ៍អាចជួយដល់សុខភាពស្បែករបស់អ្នក។ ម៉ាសបិតមុខចេកគ្រាន់តែជាជម្រើសមួយក្នុងចំណោមជម្រើសជាច្រើនទៀត។ ចូរប្រុងប្រយ័ត្នចំពោះម៉ាសបិតមុខចេក ប្រសិនបើអ្នកមានប្រវត្តិប្រតិកម្ម ឬប្រតិកម្មទៅនឹងផ្លែឈើ ឬជ័រផ្លែឈើ៕
