កន្ទួត គឺជាផ្លែឈើមានរសជាតិជូរ និងមានពូជខ្លះរសជាតិជូរអែមនិងផ្អែម ដែលប្រជាពលរដ្ឋនៅតាមបណ្ដាស្រុកភូមិនិយមដាំ និងពិសា។ កន្ទួតមានពីរប្រភេទ គឺកន្ទួតស្រុក និងកន្ទួតព្រៃ។ កន្ទួតទាំងពីរប្រភេទនេះសុទ្ធតែមានអត្ថប្រយោជន៍ដល់សុខភាពដូចៗគ្នា។ ខាងក្រោមនេះ គឺជាកំពូលអត្ថប្រយោជន៍របស់វា៖
បើតាមឯកសារ «រុក្ខជាតិឱសថកម្ពុជា» បានបញ្ជាក់ថាការព្យាបាលបែបបូរាណគេប្រើប្រាស់ស្លឹកនិងឫសកន្ទួតសម្រាប់ឃាត់ឈាមពេលមានរបួស ឬរំលាយឈាមកក ធ្វើឱ្យឈាមរត់ស្រួល។ នៅក្នុងផ្លែកន្ទួតមានផ្ទុកសារធាតុ Protides, Lipdes, Glucides, អាស៊ីត Acetique, និងវីតាមីន C…។ ចំណែកឫសរបស់កន្ទួតវិញមាន តានីន Tanin ១៨% (តានីនគឺជាក្រុមនៃជីវម៉ូលេគុលប៉ូលីហ្វេណុលដែលមានសារធាតុ ភ្ជាប់ទៅនឹងប្រូតេអ៊ីន និងសមាសធាតុសរីរាង្គផ្សេងទៀត រួមទាំងអាស៊ីតអាមីណូ និងអាល់កាឡូអ៊ីត)។
អ្វីដែលកាន់តែអស្ចារ្យនោះគឺ កន្ទួតជាថ្នាំត្រជាក់ សម្រាប់ព្យាបាលក្អក។ មិនតែប៉ុណ្ណោះ សំបកដើម គឺសម្រាប់ព្យាបាលរោគបូស, រោគស្វាយ, របួសចេញឈាម, រមាស់, ឈឺធ្មេញ, ឈឺភ្នែក, រលាកត្រច្រៀកមានខ្ទុះ, ក្អកមានស្លេស, ហើយគេក៏អាចយកស្លឹកនិងសំបកដើមរបស់វាទៅស្ងោរក្នុងទឹកហើយយកមកងូតដើម្បីបំបាត់រោគចែងថ្ងៃផងដែរ។
ចំណែកឯកន្ទួតព្រៃ គឺជារុក្ខជាតិឱសថ មានភាពល្បីល្បាញតាំងពីសម័យពុទ្ធកាលមកម្ល៉េះ។ រុក្ខជាតិនេះមានការដាំនិងដុះយ៉ាងសម្បូរ នៅតាមបណ្ដាប្រទេសមួយចំនួនធំដែលនៅតំបន់ត្រូពិចដូចជាប្រទេសកម្ពុជាយើងជាដើម។ល។
តាមការសិក្សាបានឱ្យដឹងថា កន្ទួតព្រៃជារុក្ខជាតិសម្បូរទៅដោយវីតាមីនសេ រួមនឹងវីតាមីនសំខាន់ៗជាច្រើនទៀត។ ខាងក្រោមនេះគឺជាអត្ថប្រយោជន៍ដ៏អស្ចារ្យនៃផ្លែកន្ទួតព្រៃចំពោះសុខភាព ៖
១-ប្រឆាំងនឹងការរលាក
កន្ទួតព្រៃ មានសមត្ថភាពជួយកាត់បន្ថយកម្រិតអាស៊ីតនៅក្នុងក្រពះ និងប្រឆាំងនឹងការរលាកក្រពះ ។ វាក៏ជួយថែរក្សាថ្លើម និងបញ្ចេញជាតិពុលដែលមិនល្អចំពោះសុខភាពយើងផងដែរ។
២- បញ្ចុះទឹកនោម
ដោយសារតែការនោមជួយបញ្ចេញជាតិពុល អំបិល និងអាស៊ីតអ៊ុយរិចចេញពីរាងកាយរបស់អ្នក ដូច្នេះការទទួលទានផ្លែកន្ទួតព្រៃមានប្រសិទ្ធភាពបន្សាបជាតិពុលនៅក្នុងរាងកាយរបស់អ្នក។
៣-ព្យាបាលការឈឺបំពង់ក
ប្រសិនបើអ្នកមានបញ្ហាឈឺ ឬរលាកបំពង់-ក ផ្លែកន្ទួតព្រៃគឺជាផ្លែឈើដ៏សក្តិសមបំផុតសម្រាប់អាការនេះ ។ ទឹកផ្លែកន្ទួតព្រៃលាយជាមួយខ្ញីចិញ្ច្រាំ និងបន្ថែមទឹកឃ្មុំ១ស្លាបព្រាបាយជាវិធីដ៏ល្អក្នុងការព្យាបាលបញ្ហាក្អក និងឈឺបំពង់កដ៏មានប្រសិទ្ធភាព ។
៤-ពង្រឹងប្រព័ន្ធការពាររាងកាយ
កន្ទួតព្រៃគឺជាប្រភពដ៏សម្បូរបែបនៃសារធាតុប្រឆាំងអុកស៊ីតកម្ម វីតាមីន ហើយសារជាតិ tannin ។ វាជួយកាត់បន្ថយការបំផ្លាញរ៉ាឌីកាល់សេរីដល់កោសិកា ដូច្នេះអាចធ្វើឱ្យប្រសើរឡើងនូវសមត្ថភាពប្រយុទ្ធប្រឆាំងនឹងជំងឺរបស់អ្នក ។
៥-ទប់ស្កាត់ការកើតគ្រោះក្នុងថង់ទឹកប្រមាត់
កូឡេស្តេរ៉ូលគឺជាមូលហេតុចម្បងដែលនាំឱ្យកើតក្រួសក្នុងថង់ទឹកប្រមាត់ ។ វីតាមីន C ក្នុងផ្លែកន្ទួតព្រៃបំលែងកូឡេស្តេរ៉ូលទៅជាប្រូតេអ៊ីននៅក្នុងថ្លើម។ ការទទួលទានផ្លែកន្ទួតព្រៃទៀងទាត់ជួយកាត់បន្ថយឱកាសនៃការកើតកូឡេស្តេរ៉ូលក៏ដូចជាលទ្ធភាពនៃការកើតជំងឺក្រួសក្នុងថង់ទឹកប្រមាត់។ បន្ថែមពីនេះ ផ្លឺកន្ទួតព្រៃក៏មានសមត្ថភាព ប្រយុទ្ធប្រឆាំងនឹងជំងឺបេះដូងបានផងដែរ។
ប៉ុន្តែទោះយ៉ាងណា គេបានរកឃើញថា ឫស និងសំបកឫស គឺមានជាតិពុលមួយចំនួន។ ក្នុងករណីបើលោកអ្នកចង់ប្រើប្រាស់វាដើម្បីបរិភោគ ឬដើម្បីព្យាបាលជំងឺ ការកំណត់ចំនួនឱ្យសមល្មមគឺជារឿងចាំបាច់បំផុត។ ម្យ៉ាងវិញទៀត ប្រសិនជាលោកអ្នកអនុវត្តិវិធីបែបបុរាណនេះហើយនៅតែមិនបានផល ដូច្នេះ ការទៅជួបជាមួយវេជ្ជបណ្ឌិតជំនាញដើម្បីពិនិត្យនិងព្យាបាលគឺជារឿងចាំបាច់បំផុត៕
