គុណសម្បត្តិ និងគុណវិបត្តិនៃការដេកក្នុងអង្រឹង

ភ

ភូមិន្ទ

•

05 មករា 2022 11:30 PM

មនុស្សម្នាក់ៗមានទម្លាប់នៃការគេងផ្សេងៗគ្នា។ ជាទូទៅមនុស្សគឺគេងនៅទីរាបស្មើ ដូចជាលើកន្ទេល ពូក លើគ្រែជាដើម។ ប៉ុន្តែមានអ្នកមួយចំនួននិយមចូលចិត្តគេងក្នុងអង្រឹងព្រោះគេយល់ថាមានភាពស្រណុកសុខស្រួលជាង។ តើអ្វីជា គុណសម្បត្តិ និងគុណវិបត្តិនៃការគេងក្នុងអង្រឹង?

អត្ថប្រយោជន៍នៃការគេងក្នុងអង្រឹង

រហូតមកដល់ពេលនេះ អ្នកវិទ្យាសាស្រ្តមិនបានស្រាវជ្រាវឱ្យទូលំទូលាយអំពីអត្ថប្រយោជន៍នៃការគេងអង្រឹងនោះទេ។ ទោះយ៉ាងណា មានភស្តុតាងមួយចំនួនដែលបង្ហាញថា ការគេងក្នុងអង្រឹងអាចផ្តល់នូវអត្ថប្រយោជន៍មួយចំនួន៖

គេងកាន់តែលក់ស្រួល

ចលនាយោលយោកនៃអង្រឹងអាចជំរុញឱ្យការគេងកាន់តែលក់ស្កប់ស្កល់។ គំនិតនេះត្រូវបានបង្ហាញនៅក្នុងការសិក្សាតូចមួយកាលពីឆ្នាំ ២០១១ ទៅលើបុរស ១២នាក់។ ពួកគេបានគេងនៅពេលរសៀលចំនួនពីរថ្ងៃផ្សេងគ្នា ក្នុងរយៈពេល ៤៥ នាទី ដោយមួយថ្ងៃគេងលើទីរាបស្មើធម្មតា និងមួយពេលទៀតគេលើអង្រឹង។ ការសិក្សាបានរកឃើញថា ការគេងក្នុងអង្រឹងធ្វើឱ្យការគេងមានភាពស្កប់ស្កល់ជាង។

ការបន្ធូរបន្ថយចំណុចសម្ពាធ

ជាទូទៅ ការគេងលើពូកផ្តល់សម្ពាធច្រើនលើអ្នកដូចជាត្រង់ចំណុច ស្មា និង គូទ។ ដោយឡែក ការគេងលើអង្រឹងត្រូវបានគេនិយាយថា នឹងបន្ថយសម្ពាធលើតំបន់ទាំងនេះ។ វាធ្វើឱ្យមានសម្ពាធស្មើគ្នាលើផ្នែកទាំងអស់នៃរាងកាយរបស់អ្នក និងក៏បង្កើតជាទម្រង់កោងធម្មជាតិនៃរាងកាយរបស់អ្នកផងដែរ។

ការប៉ះពាល់តិចទៅនឹងមេរោគ

ប្រសិនបើអ្នកគេងនៅខាងក្រៅ ឬពូករបស់អ្នកនៅលើឥដ្ឋ ការដេកអង្រឹងប្រហែលជាមានប្រយោជន៍ជាង។ វាមានប្រយោជន៍ ឬប្រសិទ្ធភាពប្រសិនបើអ្នកកំពុងបោះជំរំ ។ នៅក្នុងបន្ទប់គេង ការដេកក្នុងអង្រឹងអាចកាត់បន្ថយហានិភ័យនៃធូលីដីដែលកកកុញនៅលើពូក។ ទោះយ៉ាងណា ការគេងអង្រឹងមិនអាចលុបបំបាត់ការប៉ះពាល់របស់អ្នកទៅនឹងមេរោគទាំងស្រុងនោះទេ។ អ្នកនៅតែអាចប៉ះពាល់ជាមួយសត្វល្អិតដែលហើរបាន។

ទោះជាយ៉ាងណា ការគេងក្នុងអង្រឹងមិនមែនសុទ្ធតែមានអត្ថប្រយោជន៍សម្រាប់គ្រប់គ្នានោះទេ។ សូមពិភាក្សាជាមួយវេជ្ជបណ្ឌិតប្រសនជាអ្នកមានទម្លាប់គេងក្នុងអង្រឹងជាប់លាប់ ឬមានបញ្ហាដោយសារគេងក្នុងអង្រឹង។