រាជធានីបាងកក៖ នាយកដ្ឋានបង្ការ ​និងកាត់បន្ថយគ្រោះមហន្តរាយ (DDPM) នៃប្រទេសថៃ បានប្រកាសអាសន្នដល់​ខេត្តចំនួន៧១ និងទីក្រុងបាងកក អំពីហានិភ័យ នៃគ្រោះទឹកជំនន់ជន់លិចភ្លាមៗ ទឹកហូរធ្លាក់ខ្លាំងពីតំបន់ខ្ពង់រាប ​ការរអិលបាក់ដី និងទឹកជំនន់លិចលង់ រហូតដល់ថ្ងៃទី ១៣ ខែកញ្ញា។ នេះបើតាមសារព័ត៌មាន The Pattaya News បានផ្សាយ កាលពីព្រឹក ថ្ងៃពុធ ទី៩ ខែកញ្ញា។

ស្ថាប័នជំនាញដដែល​នេះ បានព្យាករ ថា ភ្លៀងអាច​ធ្លាក់ពីខ្លាំងទៅខ្លាំងបំផុត​ ​នៅតាមតំបន់ជាច្រើន ដែលជំរុញឱ្យអាជ្ញាធរណែនាំដល់ប្រជាពលរដ្ឋ នៅក្នុងតំបន់ងាយរងគ្រោះឱ្យតាមដានស្ថានភាពអាកាសធាតុ បរិមាណទឹកភ្លៀង និងកម្រិតទឹក ព្រមទាំងត្រៀមខ្លួន សម្រាប់ស្ថានភាពអាសន្ន ដែលអាចនឹងកើតឡើង។ ការជូនដំណឹងនេះ គ្របដណ្តប់ទៅលើខេត្តទាំងអស់ នៅ​តំបន់ភាគខាងជើង ភាគឦសាន និងតំបន់កណ្តាល រួមទាំងទីក្រុងបាងកក និងខេត្តចំនួន ៩ នៅភាគខាងត្បូងប្រទេស​។ តំបន់ដែលមានភ្លៀងធ្លាក់លើសពីកម្រិត៩០មិល្លីម៉ែត្រ ក្នុងរយៈពេល ២៤ម៉ោង ត្រូវ​ចាត់ទុកថា មានហានិភ័យខ្ពស់ នៅក្នុងការប្រឈមមុខនឹងគ្រោះទឹកជំនន់ ទឹកហូរធ្លាក់ខ្លាំង និងការរអិលបាក់ដី។

នាយកដ្ឋានបង្ការ ​និងកាត់បន្ថយគ្រោះមហន្តរាយ បានក្រើនរម្លឹកដល់អាជ្ញាធរ នៅតាមបណ្ដាខេត្តទាំងនេះ ​ណែនាំដល់ប្រជាពលរដ្ឋនៅក្នុងសហគមន៍ងាយរងគ្រោះ ត្រូវ​រៀបចំសម្ភារៈចាំបាច់ រៀបចំផែនការធ្វើដំណើរ និងត្រៀមខ្លួនជម្លៀសចេញ ប្រសិនបើមានការណែនាំបន្ទាន់។ ទន្ទឹមគ្នានេះដែរ ភ្ញៀវទេសចរដែលចូលចិត្តដើរ​កម្សាន្ត នៅតាមតំបន់ធម្មជាតិ រួមទាំងរូងភ្នំ ទឹកធ្លាក់ និងរូងភ្នំដែលមានផ្លូវទឹកហូរនៅក្រោមដី គួរតែតាមដានការណែនាំជាផ្លូវការយ៉ាងយកចិត្តទុកដាក់ និងចៀស​វាងទីតាំងណាមួយ ដែលអាជ្ញាធរប្រកាសថា មានគ្រោះថ្នាក់​៕