រាជធានីភ្នំពេញ៖ នៅល្ងាចថ្ងៃអាទិត្យទី២៤ឧសភា ឆ្នាំ២០២៦នេះ អគ្គស្នងការដ្ឋាននគរបាលជាតិ បានបង្ហាញរបាយការណ៍ស្តីពីការបង្ក្រាបបទល្មើសគ្រឿងញៀននៅទូទាំងប្រទេស បានចំណួន១៥ករណី ក្នុងនោះអាជ្ញាធរឃាត់ខ្លួនមនុស្សពាក់ព័ន្ធនឹងបទល្មើសនេះ បានចំនួន៣៤នាក់យកមកអនុវត្តទោសទណ្ឌ...។

របាយោការណ៍បង្ក្រាបបទល្មើសគ្រឿងញៀននេះ បង្ហាញពីសមត្ថកិច្ចចម្រុះដែលរួមមាន មន្ត្រីនគរបាលជំនាញបង្ក្រាបបាន៦អង្គភាព និងមន្ត្រីកងរាជអាវុធហត្ថបង្ក្រាបបាន៣អង្គភាព នៅតាមបណ្តាខេត្តមួយចំនួនដូចជា៖ ទី១.ខេត្តបាត់ដំបង៖ សមត្ថកិច្ចនគរបាលចុះបង្ក្រាបបានលើបទល្មើសរក្សាទុក២ករណី ឃាត់បានមនុស្ស២នាក់, ប្រើប្រាស់មួយករណី ឃាត់ខ្លួនមនុស្ស៣នាក់ និងចេញដីកា ១ករណី ចាប់យកថ្នាំញៀនប្រភេទទឹកកក(Ice)២,២៧ក្រាម។ ទី២.ខេត្តកោះកុង៖ បង្ក្រាបលើបទល្មើសរក្សាទុកថ្នាំញៀនមួយករណី ឃាត់ខ្លួនមនុស្សម្នាក់ ចាប់យកថ្នាំញៀនប្រភេទទឹកកក(Ice)១,៣៩ក្រាម។ ទី៣.ខេត្តពោធិ៍សាត់៖ សមត្ថកិច្ចចុះបង្ក្រាបក្រុមជួញដូរថ្នាំញៀនបានមួយករណី ឃាត់ខ្លួនមនុស្ស៤នាក់, បទល្មើសរក្សាទុកថ្នាំញៀន២ករណី ឃាត់ខ្លួនមនុស្សបានចំនួន៤នាក់ ស្រីម្នាក់ ចាប់យកថ្នាំញៀនប្រភេទទឹកកក(Ice)ចំនួន២១៩,០៨ក្រាម។

ទី៤.ខេត្តរតនគិរី៖ អាជ្ញាធរបង្ក្រាបបទល្មើសរក្សាទុកបានមួយករណី ឃាត់ខ្លួនមនុស្សម្នាក់ ចាប់យកថ្នាំញៀនប្រភេទទឹកកក(Ice)១,៨២ក្រាម។ ទី៥.ខេត្តស្វាយរៀង៖ អាជ្ញាធរបង្ក្រាបបទល្មើសជួញដូរបានមួយករណី ឃាត់ខ្លួនមនុស្ស៤នាក់ ស្រី ២នាក់ ចាប់យកថ្នាំញៀនប្រភេទទឹកកក(Ice)២៥,៨៦ក្រាម។ និងទី៦.ខេត្តតាកែវ៖ សមត្ថកិច្ចបង្ក្រាបបទល្មើសរក្សាទុកថ្នាំញៀន បាន៣ករណី ឃាត់ខ្លួនមនុស្សបានចំនួន៦នាក់ ចាប់យកថ្នាំញៀនប្រភេទទឹកកក(Ice)៩,១០ក្រាម។ ដោយឡែក ខាងមន្ត្រីកងរាជអាវុធហត្ថវិញ បង្ក្រាបបទល្មើសគ្រឿងញៀនលើ៣រាជធានី-ខេត្ត រួមមាន៖ ទី១.រាជធានីភ្នំពេញ៖ បទល្មើសជួញដូរមួយករណី ឃាត់ខ្លួនមនុស្សបានម្នាក់ ចាប់យកថ្នាំញៀនប្រភេទទឹកកក(Ice)១២១១,៤០ក្រាម។ ទី២.ខេត្តកំពង់ចាម៖ បទល្មើសជួញដូរមួយករណី ឃាត់ខ្លួនមនុស្សបានចំនួន២នាក់ ចាប់យកថ្នាំញៀនប្រភេទទឹកកក(Ice)១២,៥២ក្រាម។ និងទី៣.ខេត្តព្រះសីហនុ៖ អាជ្ញាធរបង្ក្រាបបទល្មើសរក្សាទុកមួយករណី ឃាត់ខ្លួនមនុស្សបានចំនួន៦នាក់ ចាប់យកថ្នាំញៀនប្រភេទទឹកកក(Ice)២,៨០ក្រាម។ សរុបជារួម៖ អាជ្ញាធរទាំងពីរស្ថាប័ន បង្ក្រាបជនប្រៀប្រាស់ ជួញដូរ និងរក្សាទុកនូវសារធាតុញៀនបានចំនួន៣៤នាក់ និងវត្ថុតាងជាប្រភេទថ្នាំមេតំហ្វេតាមីន(Ice)សរុបចំនួន១៤៨៦,២៤ក្រាម៕