ក្រុងប៉ោយប៉ែត៖ យោងតាមការឱ្យដឹងពីមន្ត្រីនគរបាលជំនាញនៃអគ្គស្នងការដ្ឋាននគរបាលជាតិ បានបញ្ជាក់ថា នៅព្រឹកថ្ងៃអាទិត្យទី២៤ ខែឧសភា ឆ្នាំ២០២៦នេះ កម្លាំងសមត្ថកិច្ចនគរបាលនៃអគ្គស្នងការដ្ឋាននគរបាលជាតិ និងរដ្ឋបាលខេត្តបន្ទាយមានជ័យ បានបន្ដប្រតិបត្តិការចុះត្រួតពិនិត្យលើទីតាំងមួយចំនួនដែលសង្ស័យថា មានការលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ឬ(Online Scams) នៅក្នុងភូមិសាស្ដ្រភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ...។
ប្រតិបត្តិការចុះបង្ក្រាបនេះ កម្លាំងសមត្ថកិច្ចនៃអគ្គស្នងការដ្ឋាននគរបាលជាតិ ដឹកនាំដោយលោកឧត្តមសេនីយ៍ឯក អ៊ី សុខឃី អគ្គស្នងការរង និងលោកឧត្តមសេនីយ៍ឯក សម វណ្ណវីរៈ អគ្គស្នងការរង សហការជាមួយកងកម្លាំងគណៈបញ្ជាការឯកភាពរដ្ឋបាលខេត្ត ដឹកនាំដោយលោក លៀម សូដា អភិបាលរងខេត្តបន្ទាយមានជ័យ និងមានការចូលរួមពីកម្លាំងស្នងការដ្ឋាននគរបាលខេត្ត ក្រោមការសម្របសម្រួលនីតិវិធីពីលោក ម៉ុត សម្បត្តិ ព្រះរាជអាជ្ញារងនៃអយ្យការអមសាលាដំបូងខេត្តបន្ទាយមានជ័យ។ កម្លាំងសមត្ថកិច្ចជំនាញចម្រុះ បានចុះត្រួតពិនិត្យលើអគារមួយចំនួនរួមមាន៖ ទី១.អគារស្នាក់នៅ៦ជាន់ ផ្ទាល់ដីមាន៤៥បន្ទប់ ស្ថិតនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត មានមនុស្ស១៦៣នាក់ ស្រី១០នាក់ ជាជនជាតិឥណ្ឌូណេស៊ី។ ទី២.អគារស្ថិតនៅភូមិ/ឃុំខាងលើ មាន៧ជាន់ ផ្ទាល់ដី២៦បន្ទប់ មានមនុស្សស្នាក់នៅចំនួន៥៣នាក់ ស្រី១៣នាក់ ដែលជាជនជាតិឥណ្ឌូណេស៊ី។
ចំណែកទី៣.ទីតាំងផ្ទះផ្ទាល់ដី ស្ថិតនៅភូមិ/ឃុំខាងលើ មាន២៣បន្ទប់ និងមានមនុស្សស្នាក់នៅចំនួន២៣នាក់ (ក្នុងនោះស្រី៨នាក់) ដែលជាជនជាតិឥណ្ឌូណេស៊ីទាំងអស់។ និងទីតាំងទី៤.ស្ថិតនៅភូមិ/ឃុំខាងលើ មាន៥ជាន់ផ្ទាល់ដី មាន១១បន្ទប់ និងមានមនុស្សស្នាក់នៅចំនួន៣៦នាក់ (ក្នុងនោះស្រី៩នាក់) ដែលជាជនជាតិឥណ្ឌូណេស៊ីទាំងអស់។ ទោះជាយ៉ាងណា បើតាមការបញ្ជាក់របស់សមត្ថកិច្ច ចំពោះអគារទាំងអស់នេះ អាជ្ញាធរពិនិត្យរកមិនឃើញមានសម្ភារប្រព្រឹត្តបទល្មេីសអនឡាញស្កេមនោះទេ ប៉ុន្តែបានដាក់ការសង្ស័យបឋមថា អាចជាកន្លែងស្នាក់នៅរបស់ជនបរទេសដែលបានលបចូលមកធ្វើការនៅក្រុងប៉ោយប៉ែត ចំណែកជនបរទេសទាំងអស់នេះ ត្រូវបានមន្ត្រីនគរបាលជំនាញ ប្រគល់ជូនអាជ្ញាធរអន្តោប្រវេសន៍បន្តនីតិវិធីច្បាប់៕
