រាជធានីភ្នំពេញ៖ គិតមកដល់ម៉ោង២កន្លះ ថ្ងៃទី២៤ ខែកក្កដា ឆ្នាំ២០២៥នេះ កងទ័ពកម្ពុជា បានវ៉ៃយកប្រាសាទទាំង៣ គឺតាមាន់តូច តាមាន់ធំ និងតាក្របី បូកទាំងតំបន់មុំបី មកកាន់ទាំងស្រុងហើយ។ នេះជាការអះអាងដដែលៗដល់ទៅបីដងរបស់លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិកម្ពុជា មកកាន់អង្គភាពសារព័ត៌មាន SBM News។ 

លោកនាយឧត្តមសេនីយ៍ បញ្ជាក់យ៉ាងដូច្នេះថា៖«មកដល់ឥឡូវហ្នឹង តាមបណ្តោយព្រំដែន យើងកាន់កាប់បានទាំងស្រុងហើយ ពួកថៃរត់អស់ហើយ»។ កន្លងមក ប្រាសាទទាំង៣ និងតំបន់មុំបី សុទ្ធតែមានកងទ័ពកម្ពុជា-ថៃឈរជើងរៀងៗខ្លួន។ នៅព្រឹកថ្ងៃទី២៤កក្កដានេះ កងទ័ពថៃ ស្រាប់តែយកបន្លាលួសទៅស្រាស់នៅជើងប្រាសាទតាមាន់ធំ ហើយកងទ័ពកម្ពុជា ក៏ដោះចេញវិញ ពេលនោះហើយ ការផ្ទុះអាវុធដាក់គ្នា ក៏កើតឡើងតែម្តង។ 

ចេញពីប្រាសាទតាមាន់ធំ កងទ័ពថៃ ក៏បន្តទៅបើកការបាញ់ប្រហារនៅតំបន់ផ្សេងផ្សេងៗទៀតតាមព្រំដែន ដូចជា ប្រាសាទតាក្របី តំបន់មុំបី និងតំបន់ភ្នំខ្មោច ជាដើម។ ក្រសួងការពារជាតិកម្ពុជា ប្រកាសថា កងទ័ពថៃ បានបើកការបាញ់ប្រហារមុន ទើបកងទ័ពកម្ពុជាបាញ់ត្រឡប់ទៅវិញ ដើម្បីការពារខ្លួន និងការពារទឹកដី។ ប៉ុន្មានម៉ោងក្រោយកងទ័ពថៃបើកការបាញ់ប្រហារតាមព្រំដែន សម្តេចនាយករដ្ឋមន្រ្តី ហ៊ុន ម៉ាណែត ក៏សរសេរលិខិតទៅកាន់ក្រុមប្រឹក្សាសន្តិសុខអង្គការសហប្រជាជាតិ សុំឱ្យបើកកិច្ចប្រជុំជាបន្ទាន់ ដើម្បីធ្វើអន្តរាគមន៍ឃាត់ថៃឱ្យបញ្ឈប់ការឈ្លានមកលើកម្ពុជា៕