រាជធានីភ្នំពេញ៖ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម លើកទឹកចិត្តដល់កសិករដាំដុះផលិតផលថ្នាំជក់នៅខេត្តត្បូងឃ្មុំ និងកំពង់ចាម ឱ្យពង្រឹងការដាំដុះ​ដោយអនុវត្តន៍តាមស្ដង់ដារបច្ចេកទេស​ សំដៅជំរុញឱ្យមានការនាំចេញទៅក្រៅប្រទេសបន្ថែមទៀត…។

លោកស្រី ចម និម្មល អំពាវនាវដូច្នេះក្នុងដំណើរទស្សនកិច្ចសិក្សា ស្តីពីការផលិត និងកែច្នៃផលិតផលថ្នាំជក់កម្ពុជាសម្រាប់ការនាំចេញ នៅស្រុកក្រូចឆ្មារ ខេត្តត្បូងឃ្មុំ​ កាលពីថ្ងៃទី៨មេសា។ លោកស្រីបានចុះទៅជួបសំណះសំណាលជាមួយប្រជាកសិករជាអ្នកដាំដុះថ្នាំជក់ផ្ទាល់ ក៏ដូចជាចុះត្រួតពិនិត្យពីរបៀបនៃការដាំដុះ ដែលគ្រប់គ្រង និងដឹកនាំដោយលោកបេនចាមីន ស៊ើលីទី Benjamin Cerletti អគ្គនាយកក្រុមហ៊ុន JTI កម្ពុជា។ ក្នុងឱកាសនោះ លោកស្រីបានណែនាំឱ្យប្រជាកសិករ អាជីវករ និងម្ចាស់ឡសម្ងួតទាំងអស់រួមគ្នាផលិត និងអនុវត្តស្របតាមស្ដង់ដារបច្ចេកទេសដែលបានកំណត់ និងជំរុញឱ្យប្រើប្រាស់បច្ចេកវិទ្យាក្នុងការផលិតថ្នាំជក់កម្ពុជា សម្រាប់នាំចេញទៅទីផ្សារអន្តរជាតិ។

លោកស្រីសង្កត់ធ្ងន់ថា៖«ក្រសួង-ស្ថាប័នពាក់ព័ន្ធទាំងអស់ និងវិស័យឯកជន ត្រូវបន្តសហការគ្នារកវិធីសាស្ដ្រឱ្យកាន់តែមានប្រសិទ្ធភាពជាសំឡេងមួយ ជាយុទ្ធសាស្ត្រមួយ ជាផែនការសកម្មភាពមួយ សហការគ្នាជាធ្លុងមួយ បង្កើតជាកម្លាំងសរុប ដើម្បីយើងអាចធានាបានតម្លៃ ធានាគុណភាព ធានាបរិមាណបង្កើនការផ្គត់ផ្គង់ក្នុងស្រុក ពង្រឹង និងពង្រីកទៅទីផ្សារនាំចេញ»។ គួរបញ្ជាក់ថា បច្ចុប្បន្នផលិតផលថ្នាំជក់ មានក្រុមហ៊ុន JTI ជាអ្នកធ្វើការកែច្នៃ វេចខ្ចប់ និងនាំចេញទៅលក់នៅទីផ្សារអន្តរជាតិ ពិសេសទីផ្សារប្រទេសជប៉ុន៕