ជំងឺរលាកពោះវៀនធំ គឺជាជំងឺលើប្រព័ន្ធរំលាយអាហាររ៉ាំរ៉ៃ ដែលកើតឡើងដោយសារស្រទាប់របស់ពោះវៀនធំ រងនៅការរលាក ដែលការរលាកនោះអាចបង្កឡើងដោយដោយសារកត្តាបង្កជាច្រើនដោយបូករួមទាំងការបង្ក ដោយមេរោគផងដែរ។
តើជំងឺនេះមានបញ្ចេញរោគសញ្ញាដូចម្ដេចខ្លះ?
រោគសញ្ញាចម្បងដែលគេច្រើនឃើញកើតមានចំពោះអ្នកដែលមានបញ្ហារលាកពោះវៀនធំនេះ គឺរួមមាន ឈឺក្នុងពោះ ចុករមួលក្នុងពោះ និងរាក (អាចមានឈាមឬគ្មានឈាមនៅក្នុងលាមក)។ ក្រៅពីរោគសញ្ញាចម្បងទាំងនោះ បញ្ហារលាកពោះវៀនធំ ក៏មានរោគសញ្ញាអមមកជាមួយផ្សេងទៀតដែរដែលមានដូចជា៖
-អស់កម្លាំង
-គ្រុនក្ដៅ ឬគ្រុនញាក់
-ឈឺចាប់សន្លាក់
-ស្រកទម្ងន់
-បាត់បង់ជាតិទឹកក្នុងខ្លួន
-ចេញកន្ទួលរមាស់លើស្បែក
តើត្រូវធ្វើរោគវិនិច្ឆ័យជំងឺនេះ ដោយរបៀបណា?
ការថត Endoscope និងការច្រិបសាច់ក្នុងពោះវៀនធំ គឺជាវិធីដែលគ្រូពេទ្យច្រើនធ្វើដើម្បីអាចធ្វើរោគវិនិច្ឆ័យឱ្យច្បាស់ជាក់លាក់ពីជំងឺរលាកពោះវៀនធំ។ ក្រៅពីតេស្តទាំងនេះ នៅមានតេស្តមួយចំនួនដែលគ្រូពេទ្យអាចនឹងត្រូវធ្វើដែលមានដូចជា ការថតរូប ដោយកាំរស្មី អិច ការថត CT scan តេស្តឈាមនិងតេស្តលាមកជាដើម។
តើជំងឺនេះ នឹងត្រូវព្យាបាលយ៉ាងដូចម្ដេច?
ការព្យាបាលជំងឺនេះ គឺអាស្រ័យទៅនឹងមូលហេតុដែលបង្កឱ្យមានជំងឺ និងប្រភេទនៃជំងឺរលាកពោះវៀនធំនោះ។ ករណីជាច្រើនដែលត្រូវការការថែទាំច្រើនជាងការថែទាំត្រឹមរោគសញ្ញា ដោយរួមមានការបន្ថែមជាតិទឹក ដោយញ៉ាំទឹកឱ្យបានច្រើន (ករណីអ្នកជំងឺមិនអាចញ៉ាំបានគឺត្រូវបញ្ចូលជាតិទឹកដោយការចាក់បញ្ចូលសេរ៉ូម) និងការប្រើថ្នាំដើម្បីបំបាត់ការឈឺចាប់។
-រលាកពោះវៀនធំបង្កដោយមេរោគ៖ បញ្ហានេះ គ្រូពេទ្យនឹងតម្រូវឱ្យអ្នកប្រើថ្នាំផ្សះ ប្រសិនបើវាបង្កឡើងដោយពពួកបាក់តេរី ប៉ុន្តែប្រសិនបើវាប្រសិនបើវាជាវីរុស គ្រូពេទ្យអាចនឹងណែនាំវីធីផ្សេងទៀត។
-រលាកពោះវៀនធំ IBD (Inflammatory Bowel Disease) ចំពោះករណីនេះ គឺគ្រូពេទ្យនឹងតម្រូវឱ្យប្រើថ្នាំដើម្បីអាចគ្រប់គ្រងជំងឺនេះ បាន។ ថ្នាំប្រឆាំងរលាក គឺជាថ្នាំដែលត្រូវប្រើដំបូង ហើយថ្នាំដែលប្រើដើម្បីទប់សកម្មភាពរបស់ប្រព័ន្ធ ភាពស៊ាំអាចនឹងត្រូវប្រើ ប្រសិនបើចាំបាច់។ ការវះកាត់អាចនឹងត្រូវធ្វើប្រសិនបើករណីជំងឺកាន់តែធ្ងន់ធ្ងរខ្លាំងឡើង៕
អត្ថបទដោយ៖ គឹម កាណែល
ប្រភព៖ mayoclinic / medicinenet/ gwhospital
