ជាការពិតណាស់ បើទោះបីជាឆ្កែនិងឆ្មា សុទ្ធតែជាសត្វមានចង្កូម និងក្រចកដ៏មុតស្រួច តែពួកវាជាសត្វដែលមានការនិយមចិញ្ចឹមនៅទូទាំងពិភាពលោក ដោយសារតែភាពឆ្លាតវៃ និងភាពគួរឱ្យស្រឡាញ់របស់វា។ ទោះយ៉ាងណា ពេលខ្លះមនុស្សក៏ត្រូវពួកវាខាំបង្កជារបួសស្នាមធ្ងន់ធ្ងរ។ ជាក់ស្ដែង ឆ្កែខាំ ត្រូវបានគេដឹងថាបង្កគ្រោះថ្នាក់ធ្ងន់ធ្ងរបើមិនទទួលបានការព្យាបាលទាន់ពេល។ ចុះចំពោះសត្វឆ្មាវិញ តើវាមានគ្រោះថ្នាក់ដែរឬទេ?
ការសិក្សាស្រាវជ្រាវបានរកឃើញថា នៅពេលដែលឆ្មាខាំ វាហាក់ដូចជាមិនមែនជារឿងធំដុំទេ ប៉ុន្តែពេលខ្លះអាចបង្កគ្រោះថ្នាក់ដល់សុខភាពយ៉ាងខ្លាំង។ សត្វឆ្មាផ្ទុកបាក់តេរីជាច្រើននៅក្នុងមាត់របស់វាដែលមានសមត្ថភាពបង្កការឆ្លងមេរោគក្នុងរបួសដែលខាំនោះ។ ជាការពិតណាស់ ថ្វីដ្បិតតែឆ្មាចិញ្ចឹមក្នុងផ្ទះតែងតែចាក់វ៉ាក់សាំងប្រឆាំងនឹងជំងឺធ្ងន់ធ្ងរ ដូចជាជំងឺឆ្កែឆ្កួតក៏ដោយ ក៏ឆ្មាដែលអនាថានៅតាមផ្លូវជាធម្មតាមិនត្រូវបានចាក់វ៉ាក់សាំងទេ ហើយអាចផ្ទុកជំងឺជាច្រើន។ ដូច្នេះអត្រាឆ្លងពីការខាំរបស់ឆ្មាគឺខ្ពស់គួរសម។ យោងតាមការស្រាវជ្រាវឆ្នាំ ២០១៨ ការឆ្លងមេរោគកើតឡើងប្រហែល ៥០ភាគរយ ចំពោះកុមារដែលត្រូវឆ្មាខាំ។
ប្រសិនបើមិនបានព្យាបាលទេ មេរោគដែលឆ្លងតាមរយៈឆ្មាខាំអាចរាលដាលទៅផ្នែកផ្សេងទៀតនៃរាងកាយ ដែលបង្កឱ្យមានជំងឺម្យ៉ាងហៅថា septicemia (ពុលឈាម) ដែលតម្រូវឱ្យសម្រាកនៅមន្ទីរពេទ្យ ។ ក្នុងករណីកម្រ ការឆ្លងទាំងនេះអាចបណ្តាលឱ្យស្លាប់។
ធ្វើដូចម្តេចទើបដឹងថាឆ្លងរោគពីឆ្មាខាំ?
រោគសញ្ញាទូទៅបំផុតនៃការឆ្លងមេរោគពីឆ្មាខាំរួមមាន៖
- ឡើងក្រហមឬប្រែពណ៌ក្រហម
- ហើម
- រលាក
- គ្រុនក្ដៅ
- ដុំពក ឬពងបែកនៅកន្លែងដែលរបួស
- មានខ្ទុះឬសារធាតុរាវដែលចេញពីមុខរបួស
- ការបាត់បង់អារម្មណ៍នៅជិតមុខរបួស
- ហើមកូនកណ្តុរ
- គ្រុនក្ដៅឬញាក់
- ញើសពេលយប់
- អស់កម្លាំង
- ខ្សោយសាច់ដុំ
- អសមត្ថភាពក្នុងការប្រើដៃរបស់អ្នក (ប្រសិនបើដៃរបស់អ្នកត្រូវបានខាំ)
ផលវិបាកនៃការឆ្លងមេរោគឆ្មា
ការឆ្លងរោគពីឆ្មាខាំ អាចនាំឱ្យមានផលវិបាកធ្ងន់ធ្ងរជាងនេះ ប្រសិនបើមិនបានព្យាបាលភ្លាមៗ។ ទាំងនេះរួមបញ្ចូលទាំង៖
- ជំងឺខួរក្បាល
- ការឆ្លងមេរោគនៅក្នុងឆ្អឹង
- ស្លាប់។ល។
ដូច្នេះ អ្នកគួរតែស្វែងរកការព្យាបាលឱ្យបានឆាប់តាមដែលអាចធ្វើទៅបាន ប្រសិនបើអ្នកចាប់ផ្តើមមានរោគសញ្ញាកាន់តែធ្ងន់ធ្ងរទាំងនេះ៕
ប្រភព៖ healthline
