ដូងប្រេងគឺជាដំណាំកសិកម្មដ៏មានសក្កានុពលក្នុងការជួយដល់សេដ្ឋកិច្ចជាតិ។ កន្លងមកយើងតែងតែឃើញដំណាំដូងប្រេងដាំដុះជាលក្ខណៈទ្រង់ទ្រាយធំៗក្នុងការធ្វើអាជីវកម្ម ប៉ុន្តែលោកអ្នកមួយចំនួនមិនបានដឹងឡើយថា ដំណាំប្រភេទនេះ គេយកវាទៅផលិតចេញជាអ្វីខ្លះនោះ។ ការស្រាវជ្រាវបានឱ្យដឹងថា ប្រេងដូងមានប្រើជាបិសេសក្នុងអាហារ ថ្នាំពេទ្យ គ្រឿងថែរក្សាសម្រស់ ផលិតផលសម្អាត និងអ្វីៗជាច្រើនទៀត។
១. អ្វីជាដូងប្រេង?
វាជាប្រេង ដែលអាចបរិភោគបានដែលបានមកពីផ្លែនៃដើមម្យ៉ាងដែលមានឈ្មោះវិទ្យាសាស្រ្តថា Elaeis guineensis។ មានប្រេងពីរប្រភេទដែលអាចផលិតបានពីផ្លែដូងប្រេងគឺ៖ ១/. ប្រេងដូងឆៅបានមកពីការច្របាច់សាច់ផ្លែ និងប្រេងដូងដែលបានមកពីការកិនគ្រាប់របស់វា។
២. តើវាអាចផលិត ទៅជាផលិតផលអ្វីខ្លះ?
សព្វថ្ងៃនេះ សារធាតុរបស់ដូងប្រេងមាននៅស្ទើរតែគ្រប់អ្វីៗទាំងអស់ដែលមនុស្សត្រូវការ។ ការស្រាវជ្រាវបានរកឃើញថា វាមានជិត ៥០% នៃផលិតផលវេចខ្ចប់ដែលយើងរកឃើញនៅក្នុងផ្សារទំនើប ដែលសូម្បីតែភីហ្សា នំដូណាត់ និងសូកូឡា រហូតដល់ សាប៊ូកក់សក់ ថ្នាំដុសធ្មេញ និងក្រែមលាបមាត់ ក៏ផលិតចេញពីសារធាតុដូងប្រេងដែរ។ វាត្រូវបានគេប្រើផងដែរនៅក្នុងចំណីសត្វ និងជាជីវឥន្ធនៈនៅក្នុងផ្នែកជាច្រើននៃពិភពលោក។
៣. ហេតុអ្វីបានជាប្រេងដូងមានគ្រប់ទីកន្លែង?
ប្រេងដូង គឺជាប្រេងដែលមានលក្ខណៈចម្រុះបំផុត ដែលមានលក្ខណៈសម្បត្តិ និងមុខងារផ្សេងៗគ្នា ដែលធ្វើឱ្យវាមានប្រយោជន៍ និងប្រើប្រាស់យ៉ាងទូលំទូលាយ។ វាធន់នឹងអុកស៊ីតកម្ម ដូច្នេះអាចផ្តល់ឱ្យផលិតផលនូវអាយុកាលបានយូរ។ វាមានស្ថិរភាពនៅសីតុណ្ហភាពខ្ពស់ ដូច្នេះវាអាចជួយឱ្យផលិតផលចៀនមានរសជាតិឈ្ងុយ និងក្រៀម។ ហើយវាក៏គ្មានក្លិន និងគ្មានពណ៌ ដូច្នេះហើយវាមិនធ្វើឱ្យខូចរូបរាង ឬក្លិនរបស់ផលិតផលអាហារឡើយ ។ នៅក្នុងបណ្តាប្រទេសនៅអាស៊ី និងអាហ្រ្វិក ដូងប្រេងត្រូវបានប្រើប្រាស់យ៉ាងទូលំទូលាយជាប្រេងចម្អិនអាហារ៕
